|
WATU 12 wanahofiwa kufa maji, huku wengine 20 hali zao zikiwa
mbaya baada ya jahazi moja lililokuwa linasafiri kutoka mkoani Tanga
kwenda Pemba, kuzama katika mkondo wa bahari wa Nungwi.
Abiria hao 20 waliookolewa, inasemekana kuwa walikuwa hawawezi
kuzungumza huku wanne kati yao wakidaiwa kuzidiwa zaidi na wote
walimbizwa hospitalini.
Habari zilizolifikia gazeti hili jana jioni kutoka eneo la tukio
zilisema kuwa jahazi hilo linalojulikana kwa jina la Sunrise lilizama
mchana, kwa kile kinachodhaniwa kuwa ni upepo mkali uliosababisha
mawimbi na hivyo maji kujaa katika chombo hicho na kisha kuzama.
Juhudi za kuwapata wakuu wa polisi visiwani Zanzibar kudhibitisha
ajali hiyo ziligonga mwamba baada ya simu zao kuita bila kupokelewa,
ingawa taarifa za awali zilisema kuwa jahazi hilo lilikuwa na abiria
zaidi ya 35.
Taarifa za awali zilisema kuwa jahazi hilo lilisajiliwa mwaka 2010 kwa ajili ya kubeba mizigo na si abiria.
Hadi tunakwenda mitamboni, Tanzania Daima ilidokezwa kuwa vikosi vya
KMKM pamoja na meli za wavuvi zilielekea eneo la ajali kwa ajili ya
kutoa msaada wa uokoaji.
Tanzania Daima ilimtafuta msemaji wa jeshi la polisi Zanzibar lakini simu yake ilikuwa haipatikani.
Kwa mara nyingine tena visiwa vya Unguja na Pemba vinakumbwa na msiba
mzito kutokana na kuzama kwa jahazi hilo la Sunrise huku ajali za meli
za Mv Skagit na Spice Islenders zikiwa bado hazisahaulika.
Mv. Skagit ilizama Julai mwaka jana wakati inatoka jijini Dar es
Salaam kwenda Zanzibar ikiwa na abiria zaidi ya 300 ambapo watu zaidi ya
100 walipoteza maisha.
Na Septemba mwaka juzi, meli ya Spice Islanders ilizama eneo hilohilo
la Nungwi ikiwa safarini kuelekea Pemba ikitokea Bandari ya Malindi,
Unguja na watu zaidi ya 240 kupoteza
|
